Merina Gris taldeak ZULOA bere disko berria aurkeztuko du. Atmosfera eder eta goibel bat, bihozmina eragiten digunari zein salbatuko gaituen horri eusteko hamar katebegi distiratsuz osaturiko lepokoa. Minari aurpegira begiratuz eta doluaren ertz guztiei helduz, zulo ilun batean sartu, egon eta ezkutatzeko balio du ZULOAk; baita kanpotik datozen argi printzak jarraituz ihes egiteko ere. Taldeak berak hartu du ekoizpena beregain, JEWLNen gidaritzapean, eta Ed is Dead ekoizle madrildarrarekin egin dute nahasketa eta masteringa.

Merina Gris 2020an sorturiko proiektua da, Sara, Julen eta Paskalen eskutik. Taldeak 2022ko martxoan egin zuen debuta “Zerua Orain” LParekin. Urteko albumik onenen rankin bat baino gehiagotan sartu zuen prentsa espezializatuak (Mondo Sonoro, Binaural, DOD Magazine). Haien lehen kontzerturako sold out-a 24 ordu baino gutxiagoan egin ondoren, estatu eta nazioarte mailako 35 kontzertu baino gehiagoko bidea egin dute. Haien pop abesti sutsu eta zakarrekin abangoardia eta nostalgia ekarri dute euskal eszenara eta estatu mailan kontuan izateko artisten artean kokatu dira. Munduko erakusleiho garrantzitsuenetakoa den ESNS (Eurosonic Noorderslag) Herbeeretako jaialdian parte hartu ondoren, Bilbao BBK Live, Primavera Sound, Mad Cool, Kaleidoscope of Culture (Serbia), Iceland Airwaves (Islandia) eta bestelako festibaletan ibili dira.